اللهم صل على محمد وال محمد وعجل فرجهم واللعن اعداهم من الاولين والاخرين الى قيام يوم الدين
الكل مستغرب ويش ه العنوان ؟ لاني بصراحة ما لقيت افضل منه ليحاكي ما نراه يوميا
ويش في امك انت؟ بصوت عالي وبدون حياء
بصراحة من فترة ابي اكتب عن ها الموضوع بس ماني عارف من وين ابدأ ويش اكتب وويش اخلي
لكن اخترت اليوم موقف واحد بس حتى نشوف ايش الجملة هذي ؟
طبعا اخص بالذات الشباب وسائقي المركبات با الدرجة الاولى بهذا الموضوع (( ادري انفخ في قربة مفضوضة )) بس ايش اعمل لازم افض فض
تمشي في الطريق بسيارتك وفي حالك الا وهذا شاب ناط عليك من طريق فرعي بدون توقف علما ان الاولية للشارع الرئيسي اللي فيه انا
تعطيه بوري ( هرن ) للتنبيه او كي ينتبه حتى لا يحصل لا سمح الله حادث ... وتسمع كلمة الشكر الجميلة
(( ويش في امك انت؟ )) وهو يشبر لك في وجهك من نافذة سيارته وكأنه امتلك الطريق واخذ عليه صك شرعي
موقف اخر
الدوار
ايه يا الدوار راح هيبتك يا الدوار - كاسر بخاطري الدوار صار ماله هيبة ولا معنى
المعروف ان الدوار الاولوية للقادم من اليسار هذي معروفة انت داخل الدوار يعني الاولوية لك والانتظار للي راح يدخل الدوار
لكن للاسف انت في طريقك ولا تشوف عينكم الا النور الدوار ماله هيبة لوحة طولها مترين في مترين مكتوب فيها
الاولوية للقادم من اليسار
لكن مالها احد ولاحد يطالع فيها
تمشي في حالك الا وداخل عليك عرض اختار احد الامرين يا تصدمه يا تركب فوق الرصيف للدوار
وكلا الامرين لو حصلو راح تسمع الجملة المفيدة
(( ويش في امك انت ))
تعطيه تنبيه بالهرن تحصل لك سبة وتفلة في وجهك
تمسك بريك حتى لا تصدمه
تحصل لك سبة وتفلة في وجهك
تكبس له بالنور حتى ينتبه
تحصل لك سبة وتفلة في وجهك
هذا اذا ماحصلت لك شخص يدحبك بدست هههههههه
وهذا مجتمعنا
ناهيكم عن الوقوف فوق خطوط المشاة بدون مراعاة اي من المشاة
ويش اكتب ويش اخلي
تدرون راح اخليها اجزاء
والنقاش لكم
ويش في امكم انتون ؟؟
