رد: التلاعب باللون و الدمج
الان نجي للدرس و أتمنى الكل يركز , و يقرا كل الكلام لانه مهم و أهم من الصور , في أمور ماراح تكون موجوده بالصور و راح تكون في شرح الدرس لكذا أتمنى الجميع يقرأ بتمعن.
راح نحاول نعمل مثل التصميم اللي قبل فتره سويته و هو iDream , و اول شي ابغاكم تنزلوا الصور اللي راح نحتاجها و هي الخلفيه و الشخصيه (اللي ما يقدر يعمل حفظ للصور يحملهم من المرفقات اخر الموضوع)
نبدأ الدرس و الترتيب راح يكون كالتالي (الشرح و الصوره في الاسفل)
ناخذ صورة الخلفيه فقط و نفتحها بالفوتوشوب عشان نعدل عليها و بعد كذا نروح لفلتر Artistic وبعدين نختار Paint Dabus مثل ماهو موضح في الصوره اسفل.
راح تفتح لنا نافذه الفلتر لتعديل الخصائص , احنا نعدل الخصائص هذي حسب ماهو موضح بالصوره اسفل بحيث تقريبا نخفي ابعادها و التفاصيل الصغيره اللي فيها بالنسبة لل sharpen بالصوره انا مخليه 1 و لكن حتى لو كان 0 عادي جداً , طبعا في فلاتر كثير موجوده تقدروا تجربوا اي شكل يعجبكم عادي و لكن بعدين في تصاميمكم انتو اللي راح تصمموها .
الان نعمل طبقة جديده و كلكم تعرفوا كيف تعملوا طبقه جديده ما يحتاج اشرح هذا الشي .
بعد ما نعمل الطبقة نروح نختار لنا لون معين و خلنا نقول البنفسجي مثلاً و بعدين نختار الفرشاه للرسم, ونضغط على التصميم رايت كلك بالماوس وراح تظهر لنا اعدادات الفرشاه , احنا نعدل الفرشاه حسب الاعدادات في الصوره اسفل , طبعا الحجم مو مهم يكون دقيق ابداً و لكن ال hardness هذا أفضل يكون 0 عشان يعطينا نعومه كبيره .
الان مثل ماهو موضح بالصوره في الاسفل , نعمل اي شكل عشوائي بالفرشاه على الطبقة الجديده و بعد كذا على اليمين في قائمة الطبقات و مثل ماهو موضح و محدد بالاصفر في الصوره تحت نختار الخيار Overlay و طبعا في خصائص كثيره هناك و لكني شفت انسب وحده لهذا التصميم هي Overlay .
الان نجي و نفتح صورة الشخصيه و نسحبها للعمل اللي نشتغل عليه مثل ماهو موضح بالصوره
نلاحظ ان الشخصيه شويه باهته الوانها و نبغى نوضحها أكثر شوي , نروح فوق لـ image و بعدين نروح ل Adjustment و نختار levels مثل ماهو موضح بالصوره
الان راح يفتح لنا نافذه ال levels و فيها عدة خيارات مثل ما تشوفوا , احنا علينا السهم الابيض نحركه شوي لين يبدأ في الرسم البياني اللون الاسود يكبر شوي, و نقدر ايضا ناخذ السهم الاسود و نقريبه شوي بس طبعا انا استخدمت هذي الاعدادات في الصوره بالاسفل و لكن تقدروا انتو تغيروا شوي اذا تحبوا كل واحد على ذوقه و لكن مو تغيروها بشكل كبير لان الصوره راح تروح الوانها بعدين او تبهت او يصير فيها ظلال كثيره. و ايضا حط في بالك ان الاضاءه راح تختلف في التصميم مع اضافه بعض الالوان الاخرى . بالنسبة للسهم الرمادي هذا لا تقربوه حالياً , تقدروا تجربوا تشوفوا وش يسوي بس انا احاول ابتعد عنه قدر الامكان لان احسه شوي يعفس اللون .
الان بعد ما نعدل ال levels للتصميم نروح لـ filter و نختار sharpen مثل ماهو موضح بالصوره عشان نحدد شوي العمل و نبرز شوي اكثر الوانه و نعطيه شوي وضوح اكثر .
الحين و هذي ركزوا معاي فيها , مثل ماهو موضح بالصوره في الاسفل , نضغط على cntrl او control او ctrl بلوحة المفاتيح و نضغط بزر الفاره اليسار بداخل طبقة البنت وهذا عشان نحددها كلها البنت.
بعد كذا نروح لـ select و نختار modify و بعدين contract مثل ماهو موضح بالصورة
راح تظهر لنا هالنافذه و نحط القيمه 1 فقط , هالحركه هذا راح تخلي التحديد من الشخصيه ينقص بمقدار 1 بكسل فقط , يعني كاني انا اريد أحدد الشخصيه و الحدود او حواف الشخصيه ماهو من ضمنها و راح تعرفوا ليش عملنا كذا في الخطوه الجايه.
بعد ما نضغط ok , نضغط الان على ctrl +shift + i و هذا عشان يعكس لنا التحديد يعني الان التحديد اللي صار على الشخصيه راح منها و انعكس الى حدود او حواف الشخصيه بس و هذا هو المطلوب , و الان نروح الى فلتر blur و نختار blur مثل ماهو موضح بالصوره في الاسفل , و بكذا يصير عندنا effect او تاثير بالدمج شوي , يعني الحواف ماراح تكون بارزه بالشخصيه و يصير مظهر التصميم مو أوكي , هالعمليه او الحركه هذي مهمه جداً في كل التصاميم , احياناص ما تبين ان في فرق و لكن هو في فرق فعلاً و يمكن انه ما يكون ظاهر بهذا التصميم لانه خفيف و الدمج فيه مو مطلوب بشكل كبير و لكن في تصاميم ثانيه هالحركه تأثر كثير .
الان نعمل طبقة جديده مثل ماهو موضح بالصوره في الاسفل
الان نختار اللون الازرق مثلا (لكم حريه اختيار اي لون حسب ذوقكم) و بعدين نختار الاداه Gradient مثل ماهو موضح بالصوره
الان نروح للزاويه مثلا (مو مهم وين تقدر تروح اي مكان بالتصميم تبغى اللون الازرق يكون فيه) و تسحب لين ربع او منتصف التصميم عشان تلون المنطقه المعينه مثل ماهو واضح بالصوره.
طبعا اللون ماراح يكون عدل 100% و راح يكون فيه شوي غباء
😀 , و هنا الزبده وهنا طريقة الدمج تكون و هي انك تروح للخيارات اللي في قائمة الطبقات مثل ماهو موضح بالصوره في الاسفل و تختار منها اي خاصيه انت على ذوقك تشوفها مناسبه و انا في هالتصميم هذا ولهذي الطبقه بالذات اخترت color .
نفس العمليه نكررها في الزاويه فوق , نفس اللون و نفس الاعدادات كلها , و تقدروا تلعبوا بالطبقة الثانيه على كيفكم ايضا او اي لون ثاني تشوفوه مناسب و اي خيار غير color تحسوه حلو و مرتب.
في التصميم هذا بعد ما عملت الزاويه اسفل و فوق , عملت لون برتقالي مثل ماهو واضح بالصوره في الاسفل عشان اعطي شوي اضائه اكثر و اخترت لها خيار ثاني تماما وهو saturation
الان نجي لشغله مهمه جداً في الالوان وهي ال photofilter هذا راح يعطيك لون خفيف بشكل اجمالي على التصميم , نروح لاسفل قائمه الطبقات وبتشوفوا في دائره فيها لونين ابيض و اسود نضغط عليها و نختار photofilter
بعد كذا راح تظهر لكم خصائص لهذا الفلتر مثل ماهو موضح بالصوره الاسفل , و تقدروا تختاروا اي شي يعجبكم , دافئ او بارد او لون معين او اي خيار , جربوا بنفسكم و استخدموا ذوقكم بالتصميم , الاعدادات لـ Denisty غيروها ايضاً , بس لا تخلوها كثير مرتفعه فوق الى 100% او 90% لانها راح تشوه الصوره كثير , انا بالعاده و حسب التصميم اخلي الفلتر بين 25% الى 45% كحد اقصى, و اذا استخدمت أكثر من photofilter بالعاده اخلي النسبه 15% او 10% حتى , عشان لا يخترب عندي التصميم و تصير في بعض الالوان و التوهجات مو مناسبه .
الان وصلنا للنهايه ... طبعا الدرس و التصميم اللي على الدرس سويته بشكل سريع لكذا النتيجه النهائيه ماهي مثل العمل الحقيقي اللي ظليت عليه ساعات و انا انفذه . العمل الحقيقي هو نفس هذي الخطوات بالضبط و لكن الاعدادات فيها شويه فروق بسيطه و تعمدت طبعا اعمل هذا الشي , لاني ابغى كل شخص فيكم يحط لي الالوان و الاعدادات اللي تناسبه هو و ذوقه و ايضاً لأني ابغاكم تقضوا وقت بالتصميم , لان التصميم في 5 دقايق او 15 دقيقه هذا ما اعتبره تصميم
🙂 .
اعفسوا و حاولوا تكتشفوا الخصائص اللي تعلمتوها من هالدرس بشكل ثاني و جربوا , لان المحاولات هي اللي تعلم الشخص و هي اللي تبتكر التصميم.
اللي عنده اي سؤال يتفضل.
محبتي
أيمن
